ಬಾನದ ಅರಸು

ಬೊಳ್ಳಿ ಮುಗಲ್‍ದ ಸಿಂಗಾರೊಡು

ಅರಸು ಕುಲ್ಲುತೆ ಪಟ್ಟೊಡು

ಬಂಗಾರ್ದ ಬೊಲ್ಪು ಕೊರೊಡು

ತೆಲಿತೊಂದುಲ್ಲೆ ಬೊಳ್ಳಿದ ಎದುರುಡು || 1 ||

                               

ಜನಮಾನಿಡ ಮೋಕೆ ತೋಜಾದ್

ಜತ್ತೆ ಭೂಮಿತ ಮಿತ್ತ್

ಮನಸ್‍ದ ಬೇನೆ ದೂರ ಮಲ್ಪು

ಎನ್ನ ಕೈನ್ ಬರ ಪತ್ತ್ || 2 ||

ನೀರ ಪನಿಕ್ ನಿನ್ನ ಬೊಲ್ಪು

ಪೊಸ ಏಸೊಡು ಮಿನ್ನುಂಡು

ಮನಸ್‍ದಾಸೆ ತೀರ್‍ಂಡ್

ಉಡಲ್ ನಿನ್ನ ನಲಿಪುಂಡು || 3 ||

                               

ಜೋಕುಲೆ ಬುಲಿಪುನ್ ಉಂತಾಡ್

ತೆಲಿಕೆ ಪುಟ್ಟಯ ಮೋನೆಡ್

ಪೊಸತ್ ಬಾಳ್ವೆನ್ ಕೊರು

ನಿನ್ನ ಮಿಂಚುನ ಬೊಲ್ಪುಡ್ || 4 ||

ನಿನ್ನೊಟ್ಟುಗು ಸೇರ್ದ್ ನಲಿಪರ

ಕಾತೊಂದುಲ್ಲೆರ್ ಈ ರಾತ್ರೆಗ್

ಬದ್‍ಕ್‍ದ ಸಾರ ತೆರಿಪಾಲ

ಸುಗಿಪುವೆ ನಿನ್ನನ್ ಅಮವಾಸೆಗ್ || 5 ||

       ಪುಣ್ಣಮೆದ ಅರಸು

      ಶಾಂತಿ ಕೊರುಲಾ ಜಗೊಕು

ಮರಪಂದೆ ನನೊರ ಅಮಾವಾಸೆಗ್ ಬಲಾ

         ಎರ್ಕ ಕುಲ್ಲುದು ಪಾತೆರುಗ || 6 ||

ನೆಂಪು

ಬರೆತೆ ನಿನ್ನ ಪುದರ್‍ನ್

ಗಡಾಯಿ ಕಲ್ಲ್ ದ  ಮಿತ್ತ್ ಡ್

ಕಮ್ಮೆನದ ಗಾಳಿ ಇಯೆ

ಸೂರ್ಯೆ ಮುರ್ಕುನ ಪೊರ್ತುಡ್ || 1 ||

                                ಅರಮನೆ ದುಳಯಿ ಕುಲ್ಲಿನ ಪೊರ್ತು

                                ಆ ರಾತ್ರೆದ ಕನೊಟು

                                ನೆಂಪೊಂಜೆ ತೆಲಿತ್ ನಲಿತ್‍ನವು

                                ಪೊರ್ಲುದ ಮೂಜಿ ದಿನೊಟು || 2||

ಪಚ್ಚೆ ಪಜಿರ್‍ದ ಉಂತಿನ ಪನಿನೀರ್

ನಿನ್ನ ಪಜ್ಜೆಗ್ ಮುತ್ತಾಂಡ್

ನಿನ್ನ ಪೊರ್ಲುದ ತೆಲಿಕೆಗ್

ಎನ್ನುಡಲ್ ಶಾಂತಿದ ಕಡಲಾಂಡ್ || 3 ||

                                ನಿನ್ನ ಕಣ್ಣ ದೃಷ್ಠಿ

ಸಾದಿಗ್ ಬೊಪ್ಪಾದ್ ತೊಜುಂಡು

ಬಾನದಂಚಿ ತರೆದೇರ್ತ್  ತೂಲ

ನಿನ್ನ ಪೊರ್ಲುಗು ಬೊಳ್ಳಿಲ್ ಮಿನ್ನುಂಡು || 4||

 ಬರಿತೊನುವೆ ತುಳುವ ಮಣ್ಣ್ ದ  ಸಾರ

ನಿನ್ನ ಮೋಕೆ ಎನ್ನುಡಲ ಬಲೊಕು

ಹಿರಿಯಕ್ಲು ಪಂಡಿ ಪಾತೆರೊಡು

ಪುದರ್ ಕೊನಲ ಪುಟ್ಟಿ ಕುಲೊಕು || 5 ||

                                ಮೂಡಯಿ ಪಡ್ಡಾಯಿ, ತೆನ್ಕಾಯಿ ಬಡ್ಕಾಯಿಡ್

ನಿನ್ನ ಪುದರೇ ಒರಿಯೊಡು

ಉಡಲ್ ದಿಂಜಿಂದ್ ಇತ್ತೆ ಒರ

ತಾಟಿ ಬೊಟ್ಟುದು ನಲಿಪೊಡು || 6 ||-

-ವಿ. ಕೆ ಕಡಬ

ತಿರ್ಗ್‍ದ್ ತೂಲ ಒರ ಅಪ್ಪೆನಂಚಿ

ತೆಲಿಪು ಬಾಲೆ ಈ ತೆಲಿಪು

ಪೆದಿಯಪ್ಪೆ ಕಾತೊಂದುಲ್ಲಲ್

ನಲಿಪು ಬಾಲೆ ಈ ನಲಿಪು

ನೆಲಕ್ಕೂರುನ ಪಜ್ಜೆನ್ ತೂವೊಂದುಲ್ಲಲ್ || 1 ||

                                ಮೆತ್ತನೆದ ಪೊರ್ಲಾ ಪಾದೊಲು

                                ಜಕ್ಕೆಲ್‍ಡ್ ಎಲ್ಯ ಎಲ್ಯ ಪಜ್ಜೆ

                                ಆಂಡಲಾ ಅಪ್ಪೆ ದೀತಲ್

                ಸೊಕುತ ಬೊಳ್ಳಿದ ಗೆಜ್ಜೆ || 2 ||

ಪೊರ್ಲ ಮೊನೆ ಪೂಜಿದ್

ಮೋಕೆ ತೋಜಾದಲ್ ಕಣ್ಣ ನಿಲಿಕೆ

ಅಪ್ಪೆನುಡಲ್‍ಗ್ ನೆಮ್ಮದಿ ಕೊರು

ಮಿಂಚಡ್ ಮುಗುರು ತೆಲಿಕೆ || 3 ||

                                ಉಡಲ ಭಾಷೆಡ್ ಪೊರ್ಲುದ ಪದ

                                ಮುನ್ಕೊಂದು ತೊಟ್ಟಿಲ ಸುತ್ತಡ್

                 ಬಾಲೆ ನಿನ್ನ ಗೊಜ್ಜೆ ಪಾತೆರೊಗು

                 ಕಮ್ಮೆನದ ಗಾಳಿ ಇಲ್ಲಡ್  || 4 ||

ಕೈ ಗಟ್ಟಿ ಯಾತ್‍ಂಡ್ ಇತ್ತೆ

ಅಪ್ಪೆನ ಪುಗೆಲ್ ನೇಲ್‍ದ್

ಬುದ್ಧಿ ಬತ್ತ್‍ಂಡ್ ಇತ್ತೆ

ಮಿರೆ ಪೇರ್‍ನ್ ಪರ್‍ದ್ || 5 ||

ಬುಲಿಪುನಗ ಮಟ್ಟೆಲ್ಡ್ ಪಾಡ್‍ದ್ ಮಾನದ್

ಲೆತ್ತಲ್ ತೆಲಿಪುನಗ ಕೈಯೊಡ್ಡುದು

ನಿನ್ನೊಟ್ಟುಗು ದಿನ ಕಳೆಯಲ್

ಬೇನೆ ಬೇಜಾರ್‍ನ್ ಪಟ್ಟೊಂದು || 6 ||

ಕೈ ಕಾರ್‍ಗ್ ಉಡಲ ಬಲ ಕೊರೊದು

ಬಾಲೆ ನಿನ್ನ ಬುಲೆಪಾದಲ್

ನಿನ್ನ ಬಂಜಿ ದಿಂಜದ್

ಬಂಜಿದ ಬಡವು ಕಟ್ಟ್ ದಲ್ || 7 ||

ತೆಲಿತೊಂದುಲ್ಲಲ್ ಆಪ್ಪೆ ಇತ್ತೆ

ಈ ನಡತಿ ಪಜ್ಜೆನ್ ತೂದು

ತಿರ್ಗ್‍ದ್ ತೂಲ ಬರ ಅಪ್ಪೆನಂಚಿ

ಮೋಕೆ ಕೊರುಲ ಮೊನೆಮುಟ್ಟುದು || 8 ||

ಉಡಲ್ ದಿಂಜಿ ಪಾತೆರೊಡು

ಆಪ್ಪೆನ್  ಕಡೆ ಮುಟ್ಟ ಸಾಂಕೊಡು

ಅಪ್ಪೆ ಕೊರಿನ ಪ್ರೀತಿಡ್

ಸಾರ ಜನತ ಮನಸ್ ಗೆಂದೊಡು || 9 ||

ಇಲ್ಲದ ಬೇಲೆ

ಬಾಲೆ ದಪ್ಪೆ ಬೇಲೆ ಕಂಡು

ಗಾದೆನೊಂಜಿ ಕೇನ್ದನ

ದಾನೆ ಕಾರ್ ನೀರ್ದ್ ಕುಲ್ಲುದ

ಎಂಕ್ ಒರ ಪನ್ಪನಾ?||

ಬಾಲೆದಪ್ಪೆಗ್ ಬೇಲೆ ತಪ್ಪಂದ್

ಗಾದೆ ಏಪೋಲ ಸತ್ಯೊನೇ

ಬಾಲೆದ ಚಾಕ್ರಿದೊಟ್ಟುಗೆ ಬೇಲೆ

ಇಲ್ಲ ಬೇಲೆನೇ ಯಾನೆ ಮಲ್ಪುನೆ||

ಅಲಯ ಬಾಲೆ ಬುಲಿಪು ಉಂತಾವುಜೆ

ಇ೦ಚಿಗೊರ ಬೇಗ ಬರ್ಪನ

ಅರ್ಟಿದ ಕೋಣೆಗೇನ್ ನೂರ್ಪೆ

ದಾದ ಮಲ್ಪೊಡುಂದು ಪನ್ಪನ||

ಬಾಲೆ ಬುಳ್ಪಂದೆನೇ

ಅಪ್ಪೆ ಮಿರೆನೆ ಕೊರಯಲ್

ಬಾಲೆದ ಬಂಜಿ ದಿಂಜಂತೆ

ಗಂಜಿ ತೆಲಿನೆ ಪರಯಲ್||

ತಾಟಿ ಬೊಟ್ಟೊಡಾಂಡ

ರೆಡ್ಡ್ ಕೈ ಸೇರೊಡು

ಒರ್ಯನೊರಿ ತೆರಿಯೊಂದು

ಇಲ್ಲದ ಬೇಲೆ ಮಲ್ಪೊಡು ||

ತೆರಿಲೆ ಜನೊಕುಲೆ ಪೂರ

ಬಾಲೆದಪ್ಪೆಗ್ ಇರ್ಲ್ ಪಗೆಲ್ ಒಂಜೆನೆ

ತೆಲಿಕೆ ನಲಿಕೆ ದಿನಲ ಬೋಡು

ಉಂದುವೇ ಸಂಸಾರಂದ್ ಪನ್ಪುನೆ ||

– ವಿ.ಕೆ. ಕಡಬ